Xaav kuas peb kwv tij Moob Kwm lub neej tsuas muaj luj hlub, fuam vaam, txawj ntse, muaj txag nplua nuj, sis hlub sis paab, thooj sab koom ntsws hab nyob ua ib paab ib pawg. Kev tsis hum sab txhob muab ua kev chim, muaj tswv yim yuav tau nthuav tawm, suav dlawg pum lawm txhaj le paub faaj, yog tsis maaj tes yuav dlhau moog, yog tsis noog tes tsis to taub, yog tsis tau paub tes tuaj saib ntawm nuav. Thov txhob cais koj paab kwv pawg, peb tseem tsawg tsawg twb tsis muaj coob, tsuas txaus yeej noob nrug luas ua lub neej, Moob dlawb Moob leeg los yog tuab lub xeem Kwm, yuav tau sib fwm tug hlub dlhau tug yau, qhov twg ua tsis tau yuav tsum sis paab, loj teg nqug npaab koom sab koom ntsws, sib puag xub pwg sis txhawb sis hlub, txawm tsis muaj pub los nrug cawm tug pluag, tug tseem ruam yuav paab sis qha, yog tsis has tes yuav tsis paub, txhob to taub tas nyag muaj nyag nam, tsuas yog qha rua lwm tam kuas paub keeb kwm, txhua tug Moob Kwm txiv ces yog tuab leeg, nyag muaj nyag kev ntseeg los txhob sis thuam, ntau yaam sis txuam ces yog lub zug luj, kuas txhob raug luas caij tsuj hab poob ua luas cev qhev. Caij nyoog dlhau lug lawm ntev rov lug peb sis hlub, tseg txuj kev sis ntxub es tig lug tuav teg ua ke, kawm txawj kawm ntse kuas zoo xws le luas, muaj ntsej muaj muag nchaa thoob qaab ntuj, num tswv luj los kuas peb tau tuav, has lug nrov nrhuav cuag le lug maab, vaam le xub ntaab nroo le xub mu, muaj tsis tu ib txheej dlhau ib tis, fuam vaam ib txhis moog tsis paub kawg.

---